អាជ្ញាធរខេត្តបន្ទាយមានជ័យជម្លៀសពលរដ្ឋជិត២ពាន់គ្រួសារដែលរងគ្រោះពីទឹកជំនន់ទៅកាន់ទីទួលសុវត្ថិភាព
បន្ទាយមានជ័យ៖ ជំនន់ទឹកភ្លៀងក្នុងខេត្តបន្ទាយមានជ័យប៉ះពាល់ដល់ក្រុងស្រុកចំនួន៥ ធ្វើឱ្យពលរដ្ឋរងគ្រោះចំនួន៨ ៥១១គ្រួសារ និងត្រូវជម្លៀសទៅកាន់ទីទួលសុវត្ថិភាពចំនួន១ ៩២៩គ្រួសារ ដែលមានមនុស្សប្រមាណ ៤ ០១៦នាក់ ក្នុងនោះមានស្រី២ ០៥៨នាក់ និងកុមារ១ ១៩៤នាក់។
យោងតាមរបាយការណ៍របស់រដ្ឋបាលខេត្តបន្ទាយមានជ័យបានប្រាប់ឲ្យដឹងថា ក្រុងសិរីសោភ័ណ ស្រុកមង្គលបូរី ក្រុងប៉ោយប៉ែត ស្រុកអូរជ្រៅ និងស្រុកភ្នំស្រុក រងផលប៉ះពាល់ខ្លាំងជាងគេ ដែលប៉ះពាល់ដល់ពលរដ្ឋប្រមាណ ៣៤ ៦១៥នាក់។
ក្រៅពីធ្វើឱ្យប៉ះពាល់ដល់ពលរដ្ឋ ជំនន់ទឹកភ្លៀងក៏បានធ្វើឱ្យប៉ះពាល់ដល់ដំណាំស្រូវក្នុងខេត្តជាង ២ម៉ឺន៥ពាន់ហិចតា ដំឡូងជាង២០០ហិចតា ដំណាំគូបផ្សំជិត៨០ហិចតា និងប៉ះពាល់ដល់សាលារៀន២២កន្លែង វត្តអារាម៩កន្លែង និងប៉ះពាល់ដល់ផ្លូវថ្នល់ក្នុងខេត្តប្រមាណ២៣០គីឡូម៉ែត្រ៕